Be-Nam Dayaron Ka Safar Kaisa Laga Hai

be-nām dayāroñ kā safar kaisā lagā hai

ab lauT ke aa.e ho to ghar kaisā lagā hai

kaisā thā vahāñ garm do-pahroñ kā jhulasnā

barsāt-rutoñ kā ye nagar kaisā lagā hai

din meñ bhī dahal jaatā huuñ ābād gharoñ se

saayā sā mire saath ye Dar kaisā lagā hai

hoñToñ pe laraztī huī ḳhāmosh sadā kā

āñkhoñ ke darīchoñ se guzar kaisā lagā hai

āñgan meñ lagāyā thā shajar chaao se maiñ ne

phalne pe jo aayā to samar kaisā lagā hai

Leave a Comment