muskurahaten sikhen qahr ki nigahon se
dad-e-sarkashi le li ham ne kaj-kulahon se
kya kahen mohabbat ka raaz kam-nigahon se
ham ne dil banae hain ansuon se aahon se
apni maarifat ka ham ek din sabaq denge
dekhte chale jaao ajnabi nigahon se
us ke haq ka mujrim huun phir bhi us ki rahmat hai
khud bacha liya mujh ko mubtazil gunahon se
farsh par hai takht un ka arsh par dimagh apna
kya faqir rahte hain dab ke badshahon se
saare masale hal hain maslak-e-mohabbat men
un ki raah milti hai be-shumar rahon se
‘najm’ ye nishani hai ahl-e-dil ki duniya men
ham ko khaas nisbat hai gham ki bargahon se
Leave a Reply