vahi kaun-o-makan apna mata-e-zindagi apni
jahan tak le ke jaati hai mujhe avargi apni
agar rusva.iyon tak baat hoti to ghanimat thi
tamasha ban ga.i hai aaj har-su zindagi apni
palaT kar main ne dobara kabhi vo dar nahin dekha
jahan rusva hui ik baar bhi divangi apni
muqabil hai mire fitnagari ab to ḳhuda jaane
kahan tak saath deti hai mira sha.istagi apni
isi ummid par ankhen dar-e-janan ko chume hain
ki ik din rang la.egi ada-e-bandagi apni
chalan malum hai duniya ka mujh ko bhi magar ‘tashna’
mujhe ḳhamosh kar deti hai aksar sadgi apni
Leave a Reply