vahī kaun-o-makāñ apnā matā-e-zindagī apnī
jahāñ tak le ke jaatī hai mujhe āvārgī apnī
agar rusvā.iyoñ tak baat hotī to ġhanīmat thī
tamāshā ban ga.ī hai aaj har-sū zindagī apnī
palaT kar maiñ ne dobāra kabhī vo dar nahīñ dekhā
jahāñ rusvā hui ik baar bhī dīvāngī apnī
muqābil hai mire fitnagarī ab to ḳhudā jaane
kahāñ tak saath detī hai mirā shā.istagī apnī
isī ummīd par āñkheñ dar-e-jānāñ ko chūme haiñ
ki ik din rañg lā.egī adā-e-bandagī apnī
chalan mālūm hai duniyā kā mujh ko bhī magar ‘tashna’
mujhe ḳhāmosh kar detī hai aksar sādgī apnī