bas ho chuka huzur ye parde haTa.iye
sab muntazir hain samne tashrif la.iye
avaz men to aap ki be-shak ḳhulus hai
lekin zara naqab to ruḳh se haTa.iye
ham mante hain aap baḌe gham-gusar hain
lekin ye astin men kya hai dikha.iye
ab qafile ke log bhi manzil-shanas hain
aḳhir kahan ka qasd hai khul kar bata.iye
bada-kashon ki asl jagah mai-kade men hai
kis ne kaha ki aap bhi mimbar pe aa.iye
Leave a Reply