Shahnaz Muzammil
chand ghaḌiyan nahin guzri thiin shanasa.i ko
sho.ala-andam chale aa.e pazira.i ko
kaun jaane vo hasin tha ki tamanna meri
DhunD laa.i thi kahin se miri rusva.i ko
aks Thahra tha mire dida-e-tar men kab se
a.ina DhunD na paaya ruḳh-e-zeba.i ko
TuuT kar reza hue jaate hain sab ḳhvab mire
kah do girya na kare chashm-e-tamasha.i ko
bad-o-baran bhi nahin baam nahin dar bhi nahin
koi chhino na mire gosha-e-tanha.i ko
apne ehsas pe khincho na lakiren ‘shahnaz’
toḌ bhi Daalo but-e-rahzan-e-bina.i ko
Leave a Reply