ḳhirad yaqin ke sukun-zar ki talash men hai
ye dhuup saya-e-divar ki talash men hai
ḳhata chaman ki ki hai mubtala-e-lala-o-gul
bahar sirf ḳhas-o-ḳhar ki talash men hai
chhalak raha hai qaba-e-haya se us ka shabab
sharab jur.at-e-mai-ḳhvar ki talash men hai
vo nuqta huun jo bharam hai nuqush-e-hasti ka
zamana kya mire asrar ki talash men hai
vo auj huun jo ḳhalal hai nizam-e-pasti ka
vo jurm huun jo sar-e-dar ki talash men hai
ḳhas aazma hai ‘muhib’ sho.ala-zar batil se
naya ḳhalil hai gulzar ki talash men hai
Leave a Reply