utthi hai jab se dil men mire ishq ki tarang
shadi o gham hain aage mire donon ek rang
jab se hua huun bada-e-tauhid se main mast
uthti hai dil se naghma-e-mansur ki umang
dil andarun-e-sina magar ho gaya hai khuun
nikle hain meri aankhon se jo ashk surkh rang
pahunche hai tir-e-ah mira arsh ke pare
jab se laga hai dil men mire ishq ka khadang
nairangiyan tiri hain hui jaise jalva-gar
hosh-o-havas-o-aql-e-rasa jumla hain ye dang
ik baar gar vo dekhe tire rukh ko be-naqab
kaaba-parast hove vahin par but-e-farang
kar nam-o-nang tark dila rah-e-ishq men
ashiq vahi hai jis ko ki hai is se ar-o-nang
mat rakh tu bahr-e-ishq men ai bul-havas qadam
har qatre men yahan hain bala ke do sad nahang
‘asim’ main kya karun shah-e-khadim ki ab sana
hai pa-e-aql arsa-e-midhat men us ke lang