paanv jab ho ga.e patthar to sada di us ne
faisla karne men ḳhud der laga di us ne
ab jo a.ankhon men dhuan hai to shikayat kaisi
yaar ḳhud hi to charaghon ko hava di us ne
ye alag baat ki vo mera ḳharidar nahin
aa ke bazar ki raunaq to baḌha di us ne
koi shikva na shikayat na vazahat koi
mez se bas miri tasvir haTa di us ne
raat zanjir ki avaz jo kuchh tez hui
sub.h divar pe divar uTha di us ne
sirf ik raah alag thi vo mire ishq ki raah
aur vo raah bhi duniya se mila di us ne
mere ham-rah zara der ko chal kar ‘tariq’
aur kuchh vaqt ki raftar baḌha di us ne
Leave a Reply