ab yahi ranj-e-be-dili mujh ko miTa.e ya bana.e
laakh vo mehrban sahi us ki taraf bhi kaun jaa.e
ruThe hue vajud bhi dard-e-ana se kam nahin
kyuun main kisi ke naaz uTha.un mujh ko bhi koi kyuun mana.e
saya-e-qurb men milen aa vahi donon vaqt phir
honT pe sub.h jagmaga.e aankh men shaam muskura.e
din ko dayar-e-did men vus.at-e-lams se gurez
shab ko hisar-e-chashm men ḳhud hi misl-e-ḳhvab aa.e
ḳhatm hain vaqi.at bhi ziist ki vardat bhi
ab vo jhuki jhuki nazar ḳhud koi dastan suna.e
munis-e-ḳhalvat-e-vafa aaj bhi hai vo dil ki jo
sham.a ki lau men tharthara.e chand ke saath Duub jaa.e
maut ke ba.ad ziist ki bahs men mubtala the log
ham to ‘sahar’ guzar ga.e tohmat-e-zindagi uTha.e
Leave a Reply