bahs us ki meri vaqt-e-mulaqat badh gai
baten huiin kuchh aisi ki bas baat badh gai
bola na murgh-e-subh na aai sada-e-ah
ya-rab shab-e-firaq ki kya raat badh gai
islah bhi zaruri hai ab is ki shaikh-ji
dadhi tumhari qibla-e-hajat badh gai
pahunche tha apna dast-e-havas jis pe gaah gaah
vo shakh-e-meva-dar bhi haihat badh gai
shimla rakha jo dosh pe langur ki si dum
kya is men shaikh-ji ki karamat badh gai
jis din se un pe parda-e-poshidgi pada
us din se qadr-e-alam-e-jinnat badh gai
diin galiyan jo tu ne sanam ik gharib ko
kya galiyan diye se tiri zaat badh gai
de ‘mushafi’ ko neamat-o-daulat tu ai karim
ta sab kahen ki us ki ab auqat badh gai
Leave a Reply