Faisal Ajmi
har shaḳhs pareshan hai ghabraya hua hai
mahtab baḌi der se gahnaya hua hai
hai koi saḳhi is ki taraf dekhne vaala
ye haath baḌi der se phailaya hua hai
hissa hai kisi aur ka is kar-e-ziyan men
sarmaya kisi aur ka lagvaya hua hai
sanpon men asa phenk ke ab mahv-e-dua huun
malum hai dimak ne use khaya hua hai
duniya ke bujhane se bujhi hai na bujhegi
is aag ko taqdir ne dahkaya hua hai
kya dhuup hai jo abr ke siine se lagi hai
sahra bhi use dekh ke sharmaya hua hai
israr na kar mere ḳharabe se chala ja
mujh par kisi aaseb ka dil aaya hua hai
tu ḳhvab-e-digar hai tiri tadfin kahan ho
dil men to kisi aur ko dafnaya hua hai
Leave a Reply