Qalam Ki Nok Pe Rakkhunga Is Jahan Ko Main

Poet

qalam ki nok pe rakkhunga is jahan ko main

zamin lapeT ke rakh duun ki asman ko main

aziiz jaan ho jise mujh se vo gurez kare

ki aaj aaya hua huun ḳhud apni jaan ko main

hai mauj mauj muḳhalif mire safine ki

aur us pe kholne vaala huun badban ko main

fareb-e-zat se bahar nikal ke dekh mujhe

bata raha huun zamane ki an-ban ko main

hamesha lafz ki hurmat ka paas rakkha hai

baḌa aziiz huun lafzon ke ḳhandan ko main

agar main chahun to ‘mumtaz’ asman men uḌuun

guman yaqin ko de duun yaqin guman ko main