hai ye surat gham ke bas iz.har ki
Dhaal diije shakl men ash.ar ki
ḳhairiyat matlub hai dildar ki
dastan mat chheḌiye sansar ki
hai ajab surat yahan takrar ki
dil ki manen baat ya dildar ki
ḳhasiyat ye dil ke hai darbar ki
qadr hoti hai yahan bas pyaar ki
hai ḳhushi itne men hi bimar ki
koi surat to hui didar ki
zimmedari tum pe hai ghar-bar ki
harkaten chhoḌo miyan bekar ki
dil men rahte hain magar anjan se
jaane kya marzi hai apne yaar ki
mas.ala pand-o-nasihat ka durust
chhap paḌti hai magar kirdar ki
har ta.alluq ka hai kuchh maqsad ‘sahar’
kaun sunta hai kisi lachar ki
Leave a Reply