uThte hue tufan ka manzar nahin dekha
dekho mujhe gar tum ne samundar nahin dekha
guzra hua lamha tha ki bahta hua dariya
phir meri taraf us ne palaT kar nahin dekha
ik dasht mila kucha-e-janan se nikal kar
ham ne to kabhi ishq ko be-ghar nahin dekha
the sang to betab bahut naqsh-gari ko
ham ne hi unhen aankh uTha kar nahin dekha
ik umr se hai jo miri vahshat ka Thikana
ḳhushiyon ki tarah tu ne bhi vo ghar nahin dekha
nafrat bhi usi se hai parastish bhi usi ki
is dil sa koi ham ne to kafar nahin dekha
ḳhvahish ko yahan hasb-e-zarurat nahin paaya
hasil ko yahan hasab-e-muqaddar nahin dekha
har haal men dekha hai use zabt ka paikar
’tishna’ ko kabhi zarf se bahar nahin dekha
Leave a Reply