Poet
puchhoge to khul ja.egi zaḳhmon ki zaban aur
purshish to guzarti hai gham-e-dil pe giran aur
manzur jalana hai to ik baar jala do
yuun dil ke sulagne se to uThta hai dhuan aur
ḳhamoshi ne rusva.i ke gul aur khila.e
dafnaya mohabbat ko to ubhre hain nishan aur
us jaisa zamane men koi ek to hota
us dar se uThen uTh ke magar jaa.en kahan aur
chumega tire paanv ko ḳhud markaz-e-ummid
haan raqs men aa raqs men aa umr-e-ravan aur
ta-umr suna kijiye ab naghma-e-ḳhamosh
kahte na the nazuk hai na chheḌo rag-e-jan aur
Leave a Reply