Hai Khamoshi Zulm-Charkh-E-Dew-Paikar Ka Jawab

hai khamoshi zulm-charkh-e-dev-paikar ka javab

aadmi hota to ham dete barabar ka javab

jo bagula dasht-e-ghurbat men utha samjha ye main

karti hai taamir divani mire ghar ka javab

saath khanjar ke chalegi vaqt-e-zabh apni zaban

jaan dene vaale dete hain barabar ka javab

sajda karta huun jo main thokar lagata hai vo but

paanv us ka badh ke deta hai mire sar ka javab

abr ke tukde na uljhen meri mauj-e-ashk se

khushk maghzon se hai mushkil misra-e-tar ka javab

vo khincha tha main bhi khinch rahta to banti kis tarah

sar jhuka deta tha qatil tere khanjar ka javab

jite-ji mumkin nahin us shokh ka khat dekhna

baad mere aaega mere muqaddar ka javab

shaikh kahta hai barhaman ko barhaman us ko sakht

kaaba o but-khana men patthar hai patthar ka javab

roz dikhlata hai gardun kaisi kaisi suraten

but-tarashi men hai ye kafir bhi aazar ka javab

har jagah qabr-e-gada takiye men har ja gor-e-shah

ek ghar is shahr men hai dusre ghar ka javab

jalva-gar hai nur-e-haq hone se yaktai ‘amir’

saaya bhi hota agar hota payambar ka javab

Leave a Comment