Dil Se Nikal Yas Ki Zinda Hun Main Abhi

Jahangeer Nayab

dil se nikal yaas ki zinda huun main abhi

hota hai kyuun udaas ki zinda huun main abhi

mayusiyon ki qaid se ḳhud ko nikal kar

aa jaao mere paas ki zinda huun main abhi

aa kar kabhi tu diid se sairab kar mujhe

marti nahin hai pyaas ki zinda huun main abhi

mehr-o-vafa ḳhulus-o-mohabbat gudaz dil

sab kuchh hai mere paas ki zinda huun main abhi

lauTenge tere aate hi phir din bahar ke

rahti hai dil men aas ki zinda huun main

‘nayab’ shaḳh-e-chashm men khilte hain ab bhi ḳhvab

sach hai tira qayas ki zinda huun main abhi