kuchh is andaz se manga gaya dil
ḳhushamad kar ke de dena paḌa dil
are dil ai mere dil be-vafa dil
to kya mangun ḳhuda se dusra dil
gile shikvon ki kar liije safa.i
bura kyuun kijiye achchha bhala dil
hue ḳhamosh to rulva ke chhoḌa
agar ki baat to barma diya dil
mujhe to baḳhshiye aur jiine diije
mubarak aap hi ko aap ka dil
vo maqtal hi sahi mahfil kisi ki
magar kab manta hai manchala dil
na kahne degi ye chashm-e-muravvat
na puchhe ham se koi kya hua dil
phir ab kaahe ki hai sahib-salamat
tumhen darkar tha dil de diya dil
badon se bhi nahin karte bura.i
ham aisa sab ko de ‘manzar’ ḳhuda dil
Leave a Reply