Hasan Naim
mujh ko koi bhi sila milne men dushvari na thi
sab hunar aate the lekin aql se yaari na thi
jin dinon iḳhlas men thoḌi si ayyari na thi
husn ke darbar men sabit vafadari na thi
sar-kashi ke ahd-namon ki hifazat ke liye
mere qalb-o-jan se behtar koi almari na thi
jin usulon ke liye jiina bahut mushkil hua
un ki ḳhatir jaan de dene men dushvari na thi
husn hi ka vo ilaqa tha jahan sab kuchh mila
ishq ki apni alag koi zamin-dari na thi
sab pareshan hain ki aḳhir kis vaba men vo mire
jin ko ghurbat ke alava koi bimari na thi
kis tarah bad-e-fana se main bacha leta use
us ghazal paikar men koi fan ki chingari na thi
roz ik muuzi ko neze par uThata tha ‘na.im’
inqilabi quvvaton ki jab samajhdari na thi
Leave a Reply