Rishi Patialvi
ummid-e-shauq ho ya vada-e-rahat-fiza koi
mariz-e-ishq ko achchha nahin karti dava koi
bhari duniya men apne bhi hain begane bhi hain lekin
nahin hamdard ab mera tire gham ke siva koi
purana ho gaya hai zikr-e-tauba chhoḌiye saaqi
purani ho to la koi rakha koi pila koi
mujhe ye arz karni hai tumhari be-niyazi se
tumhari aarzu ke ba.ad kaisa mudda.a koi
ye apni apni aadat hai ye apni apni fitrat hai
koi hai banda-e-mehr-o-vafa to be-vafa koi
zamane ki nigahon men gunahgar-e-vafa ham hain
na jaane kyuun nahin hota hamara faisla koi
ye dil aTke ka sauda hai ye dil aa.ega qissa hai
mohabbat ki nigahon men nahin achchha bura koi
sama kar dil men parda hai nigah-e-shauq se ya.ani
ḳhud apne aap se chhupta hai ab kafir-ada koi
‘rishi’ ham har kisi se haal dil ka kah nahin sakte
baḌi mushkil se milta hai kahin dard-ashna koi
Leave a Reply