dil liya jis ne bevafai ki
rasm hai kya ye dilrubai ki
tazkira sulah-e-ghair ka na karo
baat achchhi nahin ladai ki
tum ko andesha-e-giraftari
yaan tavaqqo nahin rihai ki
vasl men kis tarah huun shadi-e-marg
mujh ko taqat nahin judai ki
dil na dene ka ham ko daava hai
kis ko hai laaf dilrubai ki
ek din tere ghar men aana hai
bakht o taale ne gar rasai ki
dil lagaya to nasehon ko kya
baat jo apne ji men aai ki
‘shefta’ vo ki jis ne saari umr
din-dari o parsai ki
akhir-e-kar mai-parast hua
shaan hai us ki kibriyai ki
Leave a Reply