ik gardish-e-mudam bhi taqdir men rahi
gard-e-safar bhi paanv ki zanjir men rahi
ḳhvabon ke intiḳhab men kya chuuk ho ga.i
har baar ik shikastagi ta.abir men rahi
rangon ka tal-mel bahut ḳhuub tha magar
phir bhi koi kami tiri tasvir men rahi
charagaron se dard ka darman na ho saka
allah jaane kya kami tadbir men rahi
kuchh der tak to zaḳhm se uljhi rahi dava
kuchh der tak to dard ki tasir men rahi
qatil ne saare daagh to paani se dho diye
taaza lahu ki bu jo thi shamshir men rahi
sho.ala-bayani go mira tarz-e-suḳhan nahin
ik aanch si magar miri tahrir men rahi
Leave a Reply