dariya guzar ga.e hain samundar guzar ga.e
pyasa raha main kitne hi manzar guzar ga.e
us jaisa dusra na samaya nigah men
kitne hasin ankhon se paikar guzar ga.e
kuchh tiir mere siine men paivast ho ga.e
kuchh tiir mere siine se bahar guzar ga.e
aansu bayan karne se qasir rahe jinhen
kya kya na zaḳhm zaat ke andar guzar ga.e
ik choT dil pe lagti rahi hai tamam shab
dil ki zamin se yadon ke lashkar guzar ga.e
vo zabt tha ki aah na nikli zaban se
dil pe hamare kitne hi ḳhanjar guzar ga.e
manzil thi vo ki hoti ga.i duur hi ‘zafar’
kitne hi rah men miil ke patthar guzar ga.e
Leave a Reply