pazhmurda dil hai vasl ke arman ko kya hua
rota huun main bahar-e-gulistan ko kya hua
kab tak uḌa.un hijr men daman ki dhajjiyan
ai sub.h tere chak-gareban ko kya hua
bulbul ke chahchahe hain na koi shagufta phuul
ai baghban bahar-e-gulistan ko kya hua
dil chiir kar dikhane ki shai ho to main dikha.un
furqat ki raat sadma miri jaan ko kya hua
dushman ka sog saaf hai chehre se ashkar
a.ina dekh zulf-e-pareshan ko kya hua
bulbul hai chup fasurda chaman luT ga.i bahar
main ne kiya jo chak-e-gareban ko kya hua
mahv-e-jamal ho ga.e a.ina dekh kar
tum kah rahe the nargis-e-hairan ko kya hua
main un ko is saval ka ab kya javab duun
daman ko astin ko gareban ko kya hua
kanTe hazar dil men hain kis kis ko roiye
phulon ko bulbulon ko gulistan ko kya hua
dil TukḌe ho ke sabr ka daman hua hai chaak
kis se kahun ki chak-gareban ko kya hua
uljha hua hai ‘shad’ ka dil baal kya banen
vo kah rahe hain zulf-e-pareshan ko kya hua
Leave a Reply