Jis Taraf Bhi Dekhti Hun Ek Hi Taswir Hai

jis taraf bhi dekhti huun ek hi tasvir hai

ai khuda kya vo miri qismat men bhi tahrir hai

is hatheli pe mohabbat ki lakiren hain bahut

haan magar zanjir men uljha khat-e-taqdir hai

mere raste men khadi hai chiin ki divar si

is taraf hain khvab mere us taraf taabir hai

jaane kyuun menhdi racha rakkhi hai mere viir ne

jaane kyuun ham ladkiyon ke paanv men zanjir hai

ham to karte the mohabbat bhi ibadat ki tarah

ab khula ‘rakhshan’ mohabbat qabil-e-tazir hai

Leave a Comment