bosa-e-rukh ka jo main saail hua
hans ke bole tu bhi is qabil hua
shahr chhuta khana-virani hui
ashiqi men ye hamen hasil hua
navik-e-mizgan-e-janan dekh kar
chhan gaya siina jigar ghayal hua
jis ki gunjaish na ho kaunain men
us ke rahne ka makan ye dil hua
ban ke aadam apne nazzara ko khud
jalva-farma vo mah-e-kamil hua
jis ke haami hazrat-e-‘varis’ hue
hal usi ka uqda-e-mushkil hua
sun ke ‘aughat’ ki fughan bola vo but
us pe kya qahr-e-khuda nazil hua
Leave a Reply