Poet
kah rahi hai ye be-qarari aaj
aur hai rang-e-dil-nigari aaj
dil ki halat bata rahi hai saaf
dil ne khaya hai zaḳhm-e-kari aaj
allah allah ye dil-gudaz nigah
ho chuki ham se parda-dari aaj
na chhupi dil ki baat nazron se
rah ga.i sab fareb-kari aaj
sham.a to roz uTha.i jaati hai
ai sahar hai hamari baari aaj
thi jo kal tak umiid ai ‘kaukab’
vahi zalim hai sogvari aaj
Leave a Reply