Arsh Siddiqui
phir usi shahr ka fasana chheḌ
mutriba tarz-e-ashiqana chheḌ
saz-e-dil se uTha tha jo ik baar
phir vahi raag valihana chheḌ
ghar hai tarik yurish-e-gham se
aaj ik atishin tarana chheḌ
phir jahan dilkashi se hai mahrum
zulf-e-hasti ko misl-e-shana chheḌ
bazm ḳhauf-e-fana se hai be-dam
kuchh ba-andaz-e-javedana chheḌ
aaj har shai se bad-guman hain ham
mat hamen ai gham-e-zamana chheḌ
ai gham-e-yar ham hain ḳhakistar
aur mat ai rafiq-e-ḳhana chheḌ
‘arsh’ thi har sukun ki jo rahzan
us qayamat ka phir fasana chheḌ
Leave a Reply