Zafar Iqbal Zafar
jo be-ghar hain unhen ghar ki dua deti hain divaren
phir apne saa.e men un ko sula deti hain divaren
asiri hi muqaddar hai to koi kya kare aḳhir
muqayyad kar ke apne men saza deti hain divaren
hamari ziist men aise bhi lamhe aate hain aksar
dararon ke tavassut se hava deti hain divaren
miri chiḳhen fasilon se kabhi bahar nahin jatin
shikasta ho ke girne par sada deti hain divaren
mayassar ghar nahin jin ko jo rahon men bhaTakte hain
‘zafar’ un ko makanon ka pata deti hain divaren
Leave a Reply