Pahle Ghire the Be-KHabron Ke Hujum Mein

pahle ghire the be-ḳhabroñ ke hujūm meñ

ab aa ga.e haiñ dīda-varoñ ke hujūm meñ

kuchh bhī nahīñ hai uḌtī huī raakh ke sivā

kyā DhūñDte ho kam-nazroñ ke hujūm meñ

shahroñ meñ ā.inoñ ke ḳharīdār hī nahīñ

ik be-kalī hai shīsha-garoñ ke hujūm meñ

pahchān liije kaun hai insāñ kā rahnumā

in be-shumār rāhbaroñ ke hujūm meñ

paivand kī tarah nazar aatā hai bad-numā

puḳhta makān kachche gharoñ ke hujūm meñ

tesha-ba-dast har koī rahtā hai raat din

ham dil-jaloñ ke be-jigaroñ ke hujūm meñ

‘daurāñ’ bhī ehtijāj hī karte hue mile

saḌkoñ pe gasht karte saroñ ke hujūm meñ

Leave a Comment