pahle ghire the be-ḳhabron ke hujum men
ab aa ga.e hain dida-varon ke hujum men
kuchh bhi nahin hai uḌti hui raakh ke siva
kya DhunDte ho kam-nazron ke hujum men
shahron men a.inon ke ḳharidar hi nahin
ik be-kali hai shisha-garon ke hujum men
pahchan liije kaun hai insan ka rahnuma
in be-shumar rahbaron ke hujum men
paivand ki tarah nazar aata hai bad-numa
puḳhta makan kachche gharon ke hujum men
tesha-ba-dast har koi rahta hai raat din
ham dil-jalon ke be-jigaron ke hujum men
‘dauran’ bhi ehtijaj hi karte hue mile
saḌkon pe gasht karte saron ke hujum men
Leave a Reply