Jahannam Se Pahle Jahannam

gandum ki vo boriyan

jo hamare hisse men aaen

un men kahaniyan nahin

mare hue kirdar bhare hue the

ham bahut muddat tak talashte rahe

apna jalaya gaya badan

magar koi naqsh mumasil nahin tha

hamare khal-o-khad se

ya shayad hamara naqsha pighal chuka tha

jo badan khud-ba-khud nahin jalte

balki jhonk diye jaate hain

aag ki bal khaai hui rassiyon men

unhen tumhari ilhami kitab

shahid likhti hai ya mahluk

ho sakta hai hamen kai sau saal pahle tak

zinda rakkha gaya ho reza reza tah men

magar ab to hamen machis ki tiliyon ki tarah

band rakha gaya hai

makanon ki Dibiyon men

jahan apne hi laave men kholti rahti hai

hamare zehnon ki haya-bakhta baghavat

magar ham shahid ki darjati sidhiyon se

gir ke apahij ho chuke hain

is liye hamen salakhon ke sunahri jaal men

par phadphadane do

kahin aisa na ho

tum hamen sokhta divaro ki matruk kahaniyan sunao

aur ham machis ki tiliyon ki tarah

bhadak uthen aur phir……..

jal ke raakh ho jaaen

jali hui tiliyon ki jagah kahan hoti hai?

ye jalane vaale se behtar

kaun jaan sakta hai?

Leave a Comment