Yahin Tha baiTha Hua Darmiyan Kahan Gaya Main

Ejaz Gul

yahin tha baiTha hua darmiyan kahan gaya main

ki mil raha nahin apna nishan kahan gaya main

na kar raha hai fulan ko fulan ḳhabar meri

na puchhta hai fulan se fulan kahan gaya main

nishan milta hai hazir men kab guzishta ka

bata sakenge na a.indagan kahan gaya main

saje hue hain piyada o asp o fiil tamam

bichhi hui hai bisat-e-jahan kahan gaya main

main kab nahin tha akarat magar raha hazir

hua huun ab ke ajab ra.egan kahan gaya main

jise yaqin tha har suud men ḳhasare ka

tha apne-ap men sharh-e-ziyan kahan gaya main

agar tha pahle hi nam-o-nishan mira mafqud

to ho ke bar-e-digar be-nishan kahan gaya main

na bhejta hai koi nama-e-firaq mujhe

na DhunDhta hai pata ḳhat-rasan kahan gaya main

jo kar raha tha guzishta ke vaqi.at durust

suna raha tha ulaT dastan kahan gaya main

liya gaya huun hirasat men be-amani ki

ki be-aman tha shahr-e-aman kahan gaya main

uTha ke le gaya darogha-e-fana shayad

khula hua hai dar-e-ḳhak-dan kahan gaya main

bujhi nahin mire atish-kade ki aag abhi

uTha nahin hai badan se dhuan kahan gaya main

nahin hua huun magar is tarah kabhi gha.eb

raha hamesha nihan dar-ayan kahan gaya main