Irfan Sattar
ab tire lams ko yaad karne ka ik silsila aur divana-pan rah gaya
tu kahin kho gaya aur pahlu men teri shabahat liye ik badan rah gaya
vo sarapa tira vo tire ḳhal-o-ḳhad meri yadon men sab muntashir ho ga.e
lafz ki justuju men larazta hua nim-va sa faqat ik dahan rah gaya
harf ke harf se kya tazadat hain tu ne bhi kuchh kaha main ne bhi kuchh kaha
tere pahlu men duniya simaTti ga.i mere hisse men harf-e-suḳhan rah gaya
tere jaane se mujh par ye uqda khula rang-o-ḳhushbu to bas teri miras the
ek hasrat saji rah ga.i gul-ba-gul ek matam chaman-dar-chaman rah gaya
ek be-nam ḳhvahish ki padash men teri palken bhi baham piro di ga.iin
ek vahshat ko sairab karte hue men bhi ankhon men le kar thakan rah gaya
arsa-e-ḳhvab se vaqt maujud ke raste men ganva di ga.i guftugu
ek israr ki bebasi rah ga.i ek inkar ka bankpan rah gaya
tu sitaron ko apni jilau men liye ja raha tha tujhe kya ḳhabar kya hua
ik tamanna dariche men baiThi rahi ek bistar kahin be-shikan rah gaya
Leave a Reply