Zard Mausam Ki Hawaon Mein Khada Hun Main Bhi

zard mausam ki havaon men khada huun main bhi

aur is soch men gum huun ki hara huun main bhi

sun ke har shakhs kuchh is tarah guzar jaata hai

jaise girte hue patton ki sada huun main bhi

meri avaz-e-shikasta ki sataish na karo

apni avaz ki lahron men chhupa huun main bhi

tujh ko takhliq kiya main ne ki mujh ko tu ne

kaun khaliq hai yahi soch raha huun main bhi

vo jo tufan-e-khudi le ke bada hai ‘abid’

us ko malum nahin koh-e-ana huun main bhi

Leave a Comment