tera arman tiri hasrat ke siva kuchh bhi nahin
dil men ab teri mohabbat ke siva kuchh bhi nahin
zindagi mujh ko kahan le ke chali aa.i hai
duur tak saya-e-zulmat ke siva kuchh bhi nahin
har taraf phuul haqiqat ke khile hain lekin
aankh men ḳhvab-e-haqiqat ke siva kuchh bhi nahin
yuun tire gham men huun pamal ki lagta hai mujhe
zindagi jaise aziyyat ke siva kuchh bhi nahin
rah ga.i dab ke mire dil hi men ummid-e-visal
ab malal-e-shab-e-furqat ke siva kuchh bhi nahin
baat kya hai ki mire doston ke hathon men
sang-e-dushnam-o-malamat ke siva kuchh bhi nahin
sher kahte ho to ye baat bhi nazron men rahe
sha.iri sharh-e-tabi.at ke siva kuchh bhi nahin
Leave a Reply