Jism TuTa Hai Jaan TuTi Hai

jism TuuTā hai jaan TuuTī hai

umr bhar kī thakān TuuTī hai

vo jo phailā thā kal dhuāñ ban kar

aaj us kī uThān TuuTī hai

aisā lagtā hai shahr TuuT gayā

sab se ūñchī dukān TuuTī hai

koī dhokā thā khā liyā us ne

us ke hāthoñ zabān TuuTī hai

vo ba-zāhir hai mutma.in lekin

us ke andar kī aan TuuTī hai

raqs taarī hai saare jañgal par

koī taaza machān TuuTī hai

Leave a Comment