Nazeer Banarasi
jab se vo kah ke ga.e hain ki abhi aate hain
koi aata hai samajhta huun vahi aate hain
barg-o-bar aate hain shaḳhon men gul-o-ghuncha bhi
vo jab aate hain chaman men to sabhi aate hain
apni qismat ka sitara to nahin gardish men
na ḳhabar aati hai un ki na vahi aate hain
ishq-e-sadiq ne jhukaya sar-e-husn-e-maghrur
jin ko da.ava tha na aane ka vahi aate hain
ashk ban kar kabhi aate hain kabhi ban ke hansi
ab mohabbat men bahar-shakl vahi aate hain
ab to ik bhiiḌ chala karti hai un ke ham-rah
baat bhi kar nahin sakte jo kabhi aate hain
piine jaate hain sar-e-sham ‘nazir’ ek buzurg
aur kuchh raat Dhale ban ke vali aate hain
Leave a Reply