rang-amezi se paida kuchh asar aisa hua
ḳhud musavvir apni hi tasvir ka shaida hua
kya nigahon ki tashaffi ho ki bazm-e-dahr men
samne aata hai har manzar mira dekha hua
khol kar ankhen zara ye husn-e-mahr-o-mah dekh
diid ke qabil hai zarra charḳh par pahuncha hua
ishq ne is dil ko dam lene ki fursat hi na di
ek jab arman nikla dusra paida hua
barq ke sho.alon munasib hai mujhi ko phunk do
kis kaleje se main dekhun ashiyan jalta hua
ik vahi apna ḳhuda hai ik vahi hai apna but
jis ke dar par sar jhuka dene se sar uncha hua
pahuncho gar ik chand par sau aur aate hain nazar
asman jaane hai kitni duur tak phaila hua
ab ‘falak’ hai ik na.i duniya ki dil ki justuju
ye zamin dekhi hui hai asman dekha hua
Leave a Reply