fitne ajab tarah ke saman-zar se uThe
saare parind shaḳh-e-samar-dar se uThe
divar ne qubul kiya sail-e-nur ko
saae tamam-tar pas-e-divar se uThe
jin ki numu men thi na muavin hava koi
aise bhi gul zamin-e-ḳhas-o-ḳhar se uThe
taslim ki sirisht bas ijab aur qubul
saare saval jur.at-e-inkar se uThe
shahr-e-ta.alluqat men uḌti hai jin se ḳhaak
fitne vo sab ra.unat-e-pindar se uThe
ankhon ko dekhne ka saliqa jab aa gaya
kitne naqab chehra-e-asrar se uThe
tasvir-e-gard ban gaya ‘akbar’ chaman tamam
kaise ghubar vadi-e-kohsar se uThe
Leave a Reply