dil Bichhad Kar Jo Chala Us But-E-Maghrur Talak

Meer Hasan

dil bichhad kar jo chala us but-e-maghrur talak

dekhta main bhi gaya us ke taiin duur talak

jaan jaave ki na jaave rahe sar ya na rahe

chhodne ke nahin ham tujh ko to maqdur talak

ab nahin vaqt taghaful ka sun ai yar-e-aziz

pahunchiyo jald zara is dil-e-ranjur talak

ham bhi tab tak hain ki yaan jalva hai jab tak tera

hasti-e-saya bhi sach puchho to hai nuur talak

zakhm-e-dil ishq ke ghar ka to dar-e-daulat hai

bhej marham ko na hamdam mire nasur talak

qasid-o-nama-o-paigham ki mat kah ki saba

ab to vaan se nahin aati dil-e-mahjur talak

mar gae din hi ko ham hijr men sad-shukr ‘hasan’

kaam pahuncha na hamara shab-e-dijur talak