be-dili se hansne ko khush-dili na samjha jaae
gham se jalte chehron ko raushni na samjha jaae
gaah gaah vahshat men ghar ki samt jaata huun
is ko dasht-e-hairat se vapsi na samjha jaae
laakh khush-guman duniya bahami taalluq ko
dosti kahen lekin dosti na samjha jaae
ham to bas ye kahte hain rose jiine marne ko
aap chahen kuchh samjhen zindagi na samjha jaae
khaak karne valon ki kya ajiib khvahish thi
khaak hone valon ko khaak bhi na samjha jaae