khul kar aḳhir jahl ka elaan hona chahiye
haq-paraston ke liye zindan hona chahiye
is vatan men muqtadir hone ki pahli shart hai
aadmi ke ruup men shaitan hona chahiye
aap jaison ko re.aya jhelti hai kis tarah
aap ko to soch kar hairan hona chahiye
niim mulla ḳhatra-e-iman hota hai agar
puura mulla ghasib-e-iman hona chahiye
dil se sharminda huun ye ash.ar jo main ne kahe
aap ke e.azaz men divan hona chahiye
Leave a Reply