lete lete karvaten tujh bin jo ghabrata huun main
naam le le kar tira raton ko chillata huun main
ghair jab kahta hai us par main bhi marta huun tab aah
vo to kya marta hai bas ghairat se mar jaata huun main
aa nikalta hai kabhi par baat vo karta nahin
bolta hai to ye kahta hai ki ab jaata huun main
tu vo hai atish ka parkala ki tere samne
aftab aa kar kahe jaade se tharrata huun main
na-tavani ne nikal jaane ka dar to kho diya
yaar ko ab apne mar jaane se dhamkata huun main
gar chalen rah-e-talab men tod dalun apne paanv
bas kabhi saaqi ke aage haath phailata huun main
abr ko dekha jo saaqi ne nigah-e-mast se
raad bola ab mai-e-gul-rang barsata huun main
daudte hain paanv jab daman-e-sahra ki taraf
haath bhi su-e-gareban saath daudata huun main