Poet
uTha ke mere zehn se shabab koi le gaya
andhere chiḳhte hain aftab koi le gaya
main saare kaghzat le ke dekhta hi rah gaya
savab koi le gaya azaab koi le gaya
supurd kar ke ḳhamushi ki mohr-e-ḳhush-numa mujhe
labon se na.ara-ha-e-inqalab koi le gaya
hai e’tiraf mere haath men jo ek chiiz thi
sambhal kar rakha to tha janab koi le gaya
ye gham nahin ki mujh ko jagna paḌa hai umr bhar
ye ranj hai ki mere saare ḳhvab koi le gaya
shajar shajar varaq varaq payam-bar vahan bhi hai
jahan se har sahifa har kitab koi le gaya
shanaḳht ho saki na phir bhi ye mira qusur tha
hamare darmiyan tha jo hijab koi le gaya
Leave a Reply