vo pahli jaisi vahshaten vo haal hi nahin raha
ki ab to shauq rahat-e-visal hi nahin raha
tamam hasraten har ik saval dafn kar chuke
hamare paas ab koi saval hi nahin raha
talash-e-rizq men ye shaam is tarah guzar gai
koi hai apna muntazir khayal hi nahin raha
in aate jaate roz-o-shab ki gardishon ko dekh kar
kisi ke hijr ka koi malal hi nahin raha
hamara kya banega kuchh na kuchh to is pe sochte
magar kabhi hamen gham-e-maal hi nahin raha
tumhare khal-o-khad pe ik kitab likh rahe the ham
magar tumhara husn be-misal hi nahin raha
sanvarta nikharta main kaise apne aap ko
tumhare baad apna kuchh khayal hi nahin raha
zara si baat se dilon men itna farq aa gaya
taalluqat ka to phir saval hi nahin raha
Leave a Reply