ishrat-afreen

Takhliq Ka Ek Git

pas sahifon men paighambaron ne likha

khudavand ne

kaenat-e-kabira ki takhliq ke satven roz

aram farmaya tha

sirf chhe roz men

kaenat-e-kabira ki takhliq ka ye amal

phir khuda so gaya aur sota raha

aur ab

jab se takhliq ka baar uthaya hai main ne

pata ye chala

ki mujh men vahi kaenat-e-kabira

haule haule javan ho rahi hai

dhire dhire numu pa rahi hai

qatra qatra mujhe pi rahi hai

khudavand ki kaenat-e-kabira

mire batn men ji rahi hai

jis ki takmil ke vaste

mujh ko nau roz darkar hain

aur phir us ke aage ka saara safar

be-karan dard takhliq ka silsila

aur be-khvab ankhon men maasum makhluq ke

bud-o-nabud ka zaicha

vaqt ke vasl aur hijr ka zaiqa

mere hisse men hai

mere hisse ka tha

More Poems

Leave a Comment