Samad Ansari
haq-nava.i ko zamane ki zaban kaun kare
aisi talḳhi ko ‘samad’ lazzat-e-jan kaun kare
ab sar-e-dar vafaon ke liye kaun aa.e
chand ḳhvabon ke liye tark-e-jahan kaun kare
ham ne maana ki baḌi chiiz hai pabandi-vaqt
sajda-e-shauq ko paband-e-azan kaun kare
vaqt ki chaap se gunji hai miri tanha.i
vaqt ki chaap ko ab aur garan kaun kare
kaun unchi kare bujhte hue anfas ki lau
is andhere men talash-e-rag-e-jan kaun kare
sho.ala-e-fikr pe suraj ka guman hota hai
sho.ala-e-fikr ko mohtaj-e-bayan kaun kare
ham vo patthar hain ki saiqal ho to a.ina banen
sang par mashk-e-fan-e-shisha-garan kaun kare
kaun dikhla.e haqiqat ko ‘samad’ rah-e-majaz
hasil-e-dida-o-dil nazr-e-butan kaun kare
Leave a Reply