ah-e-jan-soz ki mahrumi-e-tasir na dekh
ho hi jaegi koi jiine ki tadbir na dekh
hadse aur bhi guzre tiri ulfat ke siva
haan mujhe dekh mujhe ab meri tasvir na dekh
ye zara duur pe manzil ye ujala ye sukun
khvab ko dekh abhi khvab ki tabir na dekh
dekh zindan se pare rang-e-chaman josh-e-bahar
raqs karna hai to phir paanv ki zanjir na dekh
kuchh bhi huun phir bhi dukhe dil ki sada huun nadan
meri baton ko samajh talkhi-e-taqrir na dekh
vahi ‘majruh’ vahi shair-e-avara-mizaj
koi uttha hai tiri bazm se dil-gir na dekh
Leave a Reply