ahmad-zafar

Kisi Parinde Ki Wapsi Ka Safar Meri Khak Mein Milega

kisi parinde ki vapsi ka safar miri khaak men milega

main chup rahunga shajar ki surat shajar miri khaak men milega

udaas ankhen sulagte chehron ki mujh ko avaz de rahi hain

kabhi jo abad rah chuka hai vo ghar miri khaak men milega

lahu ki barish men zard phulon ki pattiyon se likha gaya huun

main lafz ka zaiqa zaban par asar miri khaak men milega

dayar-e-shab ke bhatakte raahi shikar-e-tashkik-o-kam-nigahi

alaav raushan kahin jo kar de sharar miri khaak men milega

azal se suraj abad men talash jis ko karta hua gaya hai

sadaf zamin hai to zindagi ka guhar miri khaak men milega

vo bastiyan jo tabahiyon men numu ki tasvir ban gai hain

vajud jin ka kahin nahin hai magar miri khaak men milega

main chashm-e-pur-nam ki mishalon se charagh-e-farda jala raha huun

ki naqsh-e-irfan-o-agahi bhi ‘zafar’ miri khaak men milega

More Poems

Leave a Comment