Jafar Sahni
aarzu kamran nahin lagti
zindagi shadman nahin lagti
hai halavat nahin bayan men jab
dil-nashin dastan nahin lagti
main saja kar ise bahut ḳhush huun
phir bhi mahfil javan nahin lagti
ishq ke bol yuun to dilkash hain
mo’atabar si zaban nahin lagti
guftugu kar ke aaj jugnu se
raat kuchh ra.egan nahin lagti
rang ḳhushbu saba nahin mujh men
soch jannat-nishan nahin lagti
pyaar ki vo hasin si aahaT
jo vahan thi yahan nahin lagti
phuul shabnam ka aks lagti thi
vo hava ab ravan nahin lagti
‘sahni’-ji hazar koshish se
ye zamin asman nahin lagti
Leave a Reply